ភ្នំពេញ៖ អតីតប្រធានាធិបតីទីម័រខាងកើត លោក កៃរ៉ាឡា សាណាណា ហ្គូសម៉ៅ ( Kay rala xanana gusmao) ស្នើសុំសម្ដេចតេជោ ហ៊ុន សែន ពិនិត្យជួយវិស័យកសិកម្មដើម្បីកាត់បន្ថយការនាំចូលស្បៀងពីប្រទេសដទៃ។

លោក កៃរ៉ាឡា សាណាណា ហ្គូសម៉ៅ ( Kay rala xanana gusmao) ស្នើដូចនេះក្នុងជំនួបជាមួយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នារសៀលថ្ងៃទី៦ ខែឧសភា ឆ្នាំ២០២៣ នៅវិមានសន្តិភាព។

ក្នុងជំនួបនេះដែរ លោក កៃរ៉ាឡា សាណាណា ហ្គូសម៉ៅ ក៏បានសម្តែងនូវការភ្ញាក់ផ្អើលចំពោះការរីកចម្រើន ឆាប់រហ័សរបស់កម្ពុជាក្នុងរយៈពេលបីឆ្នាំកន្លងមក និងអបអរសាទរចំពោះសម្តេចតេជោ ហ៊ុន សែន និងប្រជាជនកម្ពុជា ចំពោះការរៀបចំព្រឹត្តិការណ៍បើកស៊ីហ្គេមលើកទី៣២ ។ 

លោកមានប្រសាសន៍ថា៖ «នេះជាលើកទីមួយហើយ ដែលលោកបានធ្វើជាសាក្សី នៃព្រឹត្តិការណ៍ដ៏អស្ចារ្យជាប្រវត្តិសាស្ត្រនេះ»។ 

ជាមួយគ្នានេះដែរ លោកក៏បានថ្លែងអំណរគុណជូនចំពោះសម្តេចតេជោ ហ៊ុន សែន ដែលបានជួយទីម័រខាងកើត ឲ្យបានចូលជាសមាជិកអាស៊ាន និងជួយទប់ស្កាត់ការរីករាលដាលជំងឺកូវីដ-១៩។

សម្ដេចតេជោ ហ៊ុន សែន បានថ្លែងអំណរគុណចំពោះលោក កៃរ៉ាឡា សាណាណា ហ្គូសម៉ៅ ដែលបានអញ្ជើញចូលរួមក្នុងព្រឹត្តិការណ៍បើកស៊ីហ្គេមនៅកម្ពុជា និងបានបញ្ជូនកីឡាករ កីឡាការិនី មកប្រកួតដែលធ្វើឲ្យស៊ីហ្គេមនៅកម្ពុជា មានភាពកាន់តែអធិកអធម។

សម្តេចតេជោ ហ៊ុន សែន ក៏បានផ្តល់អនុសាសន៍ឲ្យពិនិត្យយកចិត្តទុកដាក់លើសរសរស្តម្ភបីរបស់អាស៊ាន។ ដោយឡែកចំពោះវិស័យកសិកម្ម សម្ដេចតេជោ ហ៊ុន សែន បានជម្រាបជូនលោក កៃរ៉ាឡា សាណាណា ហ្គូសម៉ៅ ថា សម្ដេចនឹងបញ្ជូនអ្នកជំនាញកសិកម្មទៅពិនិត្យមើលស្ថានភាពដី និងស្ថានភាពជាក់ស្តែង ដើម្បីជួយដល់ការផលិតកម្មកសិកម្មនៅទីម័រខាងកើត៕